ஏழை மாணவர்களுக்காக ஒரு அமைப்பு - அசுரன்

அன்புள்ள ஈகரை உறவுகளே!

வணக்கம்!.

ஏழை எளிய மாணவர்கள் உள்ள நமது நாட்டில் அவர்களுக்கு உதவியாக பள்ளிக் கட்டணம் மற்றும் படிப்பு உபகரணங்கள் ஆகியவற்றை இலவசமாக அளிக்கும் விதமாக ஒரு அமைப்பை உருவாக்கலாம் என்று இருக்கிறேன். இதை ஏற்கெனவே அமைப்பு இல்லாத தனி மனிதனாக இதுநாள் வரை செய்து வந்த நான், எங்கள் பள்ளி ஆசிரியர்கள் மூவர் உதவியுடன் ஒரு அமைப்பாகவே ஆரம்பிக்க இருக்கிறேன்.

நோக்கம்
ஏழை எளிய மாணவ மாணவியர்களின் பள்ளிக்கட்டணம் மற்றும் படிப்பு சம்பந்தமாக புத்தகம், பை மற்றும் இதர உபகரணங்கள் வாங்கித்தருதல், பள்ளி மாணவ மாணவியர் உடல்நலக்குறைவு ஏற்பட்டால் அவர்களுக்கு மருத்துவ உதவி பெற்றுத் தருதல் இந்த அமைப்பின் நோக்கமாக இருக்கும்.

குறிக்கோள்
யாரும் இந்த உலகில் ஏழை இல்லை, ஏழையாக பிறக்கலாம், ஆனால் யாரும் ஏழையாக இருக்கக்கூடாது, தான் இயலாதவன் என்று எந்த குழந்தையும் நினைத்துவிடக் கூடாது என்ற குறிக்கோளை அடிப்படையாக கொண்டது தான் இந்த இயக்கம்.

பெயர்
தொன்போஸ்கோவின் நண்பர்கள் குழு

இந்த கல்வியாண்டு முதலே இந்த அமைப்பை நாங்கள் செயல்படுத்த இருக்கிறோம் என்பதை ஈகரை உறவுகளுக்கு மகிழ்ச்சியுடன் தெரிவித்துக்கொள்கிறோம்.

இந்த அமைப்பு உருவாக காரணம்:
எங்கள் பள்ளியில் உள்ள மைதானத்தை சுத்தம் செய்யும் பெண் தொழிலாளி ஒருவரின் மகளுக்கு வயிற்றில் கட்டி இருந்தது, அதனால் அவளால் பள்ளி செல்ல முடியாமல் வீட்டிலேயே முடங்கிப்போனாள். ஒருநாள் நான் அந்த அம்மா கவலையுடன் இருப்பதை கண்டு அவர்களிடம் என்ன பிரச்சனை என்று கேட்டேன். அவர்கள் கூறிய காரணம் ஒன்றும் பெரிய விசயமாக எனக்கு படவில்லை. வயிற்று வலிக்கு ஏன் பள்ளி போகவில்லை, சரி மருத்துவரை பாருங்கள் என்று அப்போதைக்கு பணம் கொடுத்து அனுப்பி வைத்தேன். அங்கு தான் வந்தது சிக்கல், வழக்கம் போல மருத்துவர்(ன்)கள் சொல்வதை போல ஸ்கேன் எடுக்கனும் ரத்தம் செக்கப் என அடுக்கிகொண்டே பொக அந்த அம்மா வழக்கம் போல பின்வாங்கிவிட்டார்கள். மீண்டும் என்னிடம் வரவில்லை.

நான் அவர்களிடத்தில் என்ன ஆயிற்று என்று மீண்டும் கேட்டு தொல்லை செய்யவே, அவர்கள் நடந்ததை கூறினார்கள், மீண்டும் எனது நண்பர்களிடம் ஆலோசித்து விட்டு அவர்களுக்கு ஸ்கேன் செய்ய பணம் கொடுத்தோம், அதில் அவர்களின் பெண் வயிற்றில் கட்டி இருப்பதாகவும் அதை அறுவை சிகிச்சை செய்து குணமாக்க 30000 செலவாகும் என கிணறு வெட்ட பூதம் வந்துக்கொண்டிருந்தது. பிறகு அரசாங்க மருத்துவமணையில் (எழும்பூரில்) சென்று அரசாங்கம் இதற்காக என்ன வசதி செய்துள்ளது என்று கண்டறிந்து அவர்களை சரியான இடத்திற்கு அனுப்பி வைத்தோம், பிறகு ஒரு மாத மருந்து மாத்திரையில் வயிற்றில் ஏற்பட்ட வலி குறைந்து அந்த பெண் போன ஜனவரி முதல் பள்ளி மீண்டும் செல்லத் துவங்கினாள்.

தொடர் சிகிச்சையால் இப்போது மீண்டும் ஸ்கேன் செய்து பார்த்ததில் கட்டியெல்லாம் ஒன்றும் இல்லை என்றே வந்தது. எட்டில் இருந்து இப்போது ஒன்பதாம் வகுப்பு செல்கிறாள்.

ஒருவருக்கு உதவலாம், ஆனால் எத்தணை முறை உதவுவது என்றால் அவர்கள் கரையேறும் வரை கூட உதவலாம் என்று இந்த நிகழ்வில் தான் உணர்ந்துக்கொண்டேன். தனி ஒருவனாக இதை சமாளிப்பது எனக்கு ஒன்றும் பெரிய விசயம் இல்லையென்றாலும் என் எண்ணம் போலவே சிந்திக்கும் எனது நண்பர்களும் என்னுடன் இணைந்துக்கொண்டது எனக்கு மிகுந்த மகிழ்ச்சியை தந்தது.

என் பணத்தை நான் எப்படி வேண்டுமானாலும் செலவு செய்யலாம். மற்றவர்களில் பணமும் நம்முடைய பணமும் சேரும் போது நாம் நீதியுடன் நடந்துக்கொள்ள வேன்டும் என்பதற்காகவே ஒரு அமைப்பை உருவாக்க முன்வந்தேன். (நண்பர்கள் என்னிடம் பணம் கொடுத்துவிட்டு அது போதும் என்றார்கள். ஆனால் அது சரியல்ல. ஒரு கணக்கு வழக்கு என்று வைத்து அவர்களுக்கும் நம்பிக்கையாய் இருப்பது தானே சிறந்த முறை) அதனால் தான் இந்த அமைப்பை உருவாக்கியிருக்கிறேன்.

நல்ல விசயங்களை பகிர ஈகரை தான் எனக்கு பிடித்த இடம். அதனால் தான் இதை முதன் முதலாக இங்கு பகிர்கிறேன். நண்பர்களின் ஆதரவு என்றும் எனக்கு வேன்டும்.

அன்புடன்
அசுரன்